摘去鮮花，然後種出大廈？ 外星植物吞噬大廈！－《明日戰記》東廊、觀繞追逐戰
《明日戰記》熱血預告 2022年度最矚目科幻動作巨獻 8月25日 盛大公映
香港人煙稠密，大廈林立，樓貼住樓，若要好方便咁遊走城市其中，就需要依賴「天橋」系統，連綿不絕嘅行人同行車天橋，支撐住七百萬人嘅日常出行。
天橋一方面的確提供咗「點對點」嘅便利；另一方面就消弭咗市民對城市地景嘅整體印象。結果係好定壞，在此不作評論，不過香港多天橋，就係一個無可爭辯嘅事實，例如荃灣就有「天空之城」嘅稱號，佢嘅行人天橋網絡甚至威水到有一個維基欄目專門講解！
大城市內連綿不絕嘅天橋，逐漸成為咗唔少電影嘅取景舞台，就好似最近嘅科幻大作——《明日戰記》（以下有少少劇透請注意)。
平時塞到爆嘅行車天橋，點樣拍成無乜冷場嘅追逐戰？
《明日戰記》講述2055年受盡污染嘅地球，遭受外星植物潘朵拉嘅侵襲，B16受災區域被佢吞噬，空戰部隊奉命完成作戰任務，改造潘朵拉基因，解救成千上萬人口。
《明》借用兩條香港主要嘅行車天橋－東區走廊、觀塘繞道作為戲中嘅主戰場，拍出頗為緊湊嘅十五分鐘天橋追逐戰！
平日車水馬龍嘅幹道，塞車塞到爆，若要拍實境根本就無可能。唯有係揼本嘅科技幫助下，製作團隊將呢兩條行車天橋二合為一，以綠幕技術將天橋清空，比機械人同誓要完成任務嘅裝甲車追追逐逐。
係戲中，香港味道約隱約現，睇得出製作團隊有俾心機去捕捉城市嘅細節位，例如將天橋側邊嘅大廈實境，用電腦「啪」返落去做背景；馬路上嘅路牌指示，亦極具本土特色，係香港人每日見慣見熟嘅式樣。
不過我覺得最有趣係姜皓文個段：目標區域15分鐘去到啦，「唔塞車嘅話」！
如果香港唔塞車嘅話，揸車真係好方便！可惜現實…Oh no！
雖然整體故事未算好紮實，但CG方面確實無破綻。點都好，入場支持下古天樂啦！
同埋享受揸坐裝甲車，飛馳暢通無阻東廊、觀繞嘅爽快！如果放工時都可以咁衝就好啦！