一部車 連結緣份 無需運費-《緣路山旮旯》下篇
繼上篇「我直入元朗」同新界東北，今篇就駛入屯赤隧道，轉到大嶼山感受埋餘下嘅山旮旯緣份，大嶼山環山面海，山路九曲十三彎，《緣》中珈其嘅情路又會否一樣兜兜轉轉？未睇嘅你，真係推介你去撐場！計劃埋嚟緊嘅Weekend，同情人感受下大嶼山嘅靈氣～
🏝//大澳 - 梁雍婷
係大嶼山揸車，相信係好多鍾意遊車河車主嘅 Must do list之一。不過唔係想去就去，皆因大嶼山路段屬於禁區，每日限額50個，一般遊客主要靠旅遊巴出入。大嶼山環山面海，堪稱「香港後花園」，如果有得揸車嘅話，條山路將會樂趣無窮。
《緣》中珈其同梁雍婷因為同樣係棍波Swift車主而結緣，最後因為申請一張禁區紙時發現大家情路步伐唔一致而緣盡。兩人上車，一人回程，只能感激有車作伴。//
🏚//澄碧邨 - 余香凝
相信有一定人聽過澄碧邨，最平嘅海景獨立屋，世外桃園！但係衰在交通不便到一個點...直航線取消。儘管樓價幾平都好，香港人幾需要住屋需求都好，偏遠嘅澄碧邨都無人問津，恍如身處平行宇宙中嘅香港。坐船去離島時，會見到一排橙色屋頂嘅，傳說中嘅澄碧邨就係呢到啦～
《緣》中嘅余香凝住係澄碧邨。為咗爭取兩人獨處嘅時間，珈其冒住抄牌嘅風險，將架車泊係中環碼頭，轉駁搭船送對方返屋企。愛嘅感覺戰勝咗珈其兩個鐘來回船程，最終同余香凝修成正果，譜寫多一段富有香港特色嘅Long D之戀。//
《緣路山旮旯》就帶我地去晒東西南北，事實上香港點止咁少靚景？各位車主善用架車，香港仲有好多優美嘅人、事、物，值得大家細味同探索。
《緣》用光影記錄住香港嘅日月山水土地；亦選用不同風格嘅音樂貫穿整套戲，畫面配合Indie配樂，簡直係屬於香港嘅詩篇。
無論有無車都好，揸車搭船行路，乜都好，只要有心去見所愛嘅人，就能夠拉近大家嘅距離，愛係可以跨越港九新界，無需運費。
本地Indie遊車河歌單：
緣路山旮旯 OST https://open.spotify.com/playlist/1AnYxxGNNHEOoS2ymJPGtL?si=noJziUfeTxiPqqclIxa0HQ