一部車 邂逅段段香港情緣 - 《緣路山旮旯》上篇
《緣路山旮旯》係近期好出色嘅港產愛情小品，觀眾口碑極佳，亦令戲院座位表出現一片紅海，建議大家入場支持有水準嘅港產片！
《緣》中，岑珈其靠一部棍波Suzuki Swift邂逅段段情緣，沿途記錄處處鄉土情懷，《緣》無疑係寫比香港人嘅情書。唔知你有無興趣跟隨戲中主角嘅足跡，配合戲中精選嘅Local歌單，遊遍香港靚到爆嘅山旮旯地方？
唔洗再羨慕外國人可以係旅遊熱點「聖地巡禮」（即造訪戲中嘅場景，親身走一趟），香港都可以好靚，趁一啲地方尚未發展之前，就當到外地旅遊，誠邀各位車主一同環港遊，Follow us!
🌅//下白泥 - 張紋嘉
Serrini嘅《我在流浮山滴眼水》令大西北蒙上浪漫色彩，一車車嘅文青Weekend擠滿流浮山下白泥。流浮山牌坊到下白泥嘅路程，路旁嘅村房同灣景會令人有身處台灣鄉郊嘅錯覺。
《緣》中珈其同Crystal坐係泥灘岸邊，眺望深圳灣，係落霞之下傾計，就算大家無乜觸電感覺，都有幾分浪漫，至少「流浮山落日看得心醉」。前往下白泥時注意彎多路窄，假日人多車多，大家小心忍讓，唔好阻塞交通～//
🦌//沙頭角、鹿頸 - 蘇麗珊
沙頭角向來都充滿神祕色彩，因為邊境地帶並非一般人可以進入！禁區紙必須！一般車輛頂盡只能到達担水坑巴士站附近，再過就係閘口...
不過唔緊要，揸埋去鹿頸都好近，可以沿途欣賞林蔭大道同沙頭角海嘅風光。鹿頸有幾間士多可以比大家稍作休息，足以同愛驅共渡一個輕鬆下午。
《緣》中蘇麗珊因病而搬到沙頭角靜養身體，閒時踩踩單車散散步，感恩歲月靜好。//
🌲//荔枝窩梅子林 - 陳漢娜
荔枝角成日經過，荔枝窩就少聽？唔出奇呀！荔枝窩深入船灣郊野公園，人跡罕至。直至近年，各類團體進行唔同面向嘅荔枝窩復興計劃，重塑當地客家文化，連結本地旅遊模式，呢個神祕領域始被大眾認識。想去荔枝窩就有車都未必去到，要靠自己雙腳啦。
《緣》中珈其因為要幫身處荔枝窩嘅藝術家陳漢娜辦事而攀山涉水，搭巴士、搭船、行山樣樣做齊，難得到達荔枝窩，自然要留宿一兩晚，享受「城鄉共生」嘅寫意生活。//
今次去住大西北同東北先，星期五帶你去埋離島睇//大澳 - 梁雍婷//同//澄碧邨 - 余香凝//嘅故事，準備好Weekend去香港後花園未？