農曆七月揸車攻略 | 五大鬼月揸車忌諱

踏入農曆七月，夜晚落街兜風都會比屋企人提醒早啲歸家。所謂「盂蘭節氣魄更壯」，揸車心中不必驚慌。
揸車有唔少忌諱，唔知大家平時有無留意開呢？
靈異嘅嘢，寧可信其有，不可信其無。歡迎睇下當參考！

唔好超前靈車！

幾趕都好，遇到靈車時不妨等一等。一時貪快超前，趕住去死，睬！
尤其係農曆七月～揸慢少少，安全駕駛又好意頭～

講個有趣觀察比大家知：靈車通常都係行快線，前路暢通無阻，盡快駛到目的地唔會比其他駕駛者跟尾。

避免去「知名路線」出車！

香港好多出車好去處，某一兩條路線，總係蒙上特別多嘅靈異色彩。有時日光日白駛過個段山路，樹蔭之間隱約會Feel到一種寒氣。「新娘潭」呢個路名，唔少人都覺得詭異，加上道路九曲十三彎，個到嘅交通意外時有聽聞。

好多人去到鹿頸會忍唔住踩深咗油門，不妨揸慢啲欣賞下沿途風光仲好呀，對面線都無咁大壓力～

自認細膽嘅司機

呢啲時節如果出夜街都怯怯地嘅話，揸車方面就忍一忍手啦！

雖然只係眼尾「梢」到倒後鏡有陰影，係農曆七月嘅日子，就會「腦補」好多「自己嚇自己」嘅畫面（可能只係塊鏡污糟咗⋯你需要嘅唔係辟邪，而係洗車）。

揸車好多時講求信心，如果被外在因素搞到分心，咁就易發生危險！自己嚇自己通常係最得人驚！

車牌三枝香

你有無見過「111」連住嘅車牌？明明車牌號碼係運輸署隨機派出（唔計自訂車牌），點解呢「三枝香」係道路上咁唔常見嘅？其實相關部門會考慮市民嘅日常習俗，「111」呢類令人有聯想嘅車牌，都會盡量幫大家避忌，等大家揸得安心～

乜鬼都假，駕駛態度更重要！ 

自問個日無乜精神，或者心情燥燥地嘅話，最好都係唞一唞，用其他交通工具代勞啦～
若果大家係馬路上多啲禮貌同忍讓，大家精神都爽利啲，路路亨通，準時放工！

世上可能確實係無奇不有，之所以有唔同嘅交通意外，更多時係司機們稍一不慎而釀成意外⋯⋯香港地車多人多，靈異同蝦碌嘢應該遇唔少，唔知你有無相關嘅知識同經歷可以分享呢？