秋風起，準備好同架車去露營未？

返港0＋3隔離措施正式推行，各旅遊熱點陸續放寬旅遊限制。香港人嘅報復式旅行已經展開！機場離境大堂再現長長人龍，旺過旺角🛫。大家都趕住出國（有旅費又有假期淨…羨慕)，相信呢一波外遊嘅熱潮，會輕輕減少本地郊遊熱點嘅人流。

只要有好心態，香港嘅秋天都可以媲美日本嘅紅葉美景！秋天天氣最舒服，夜晚唔太凍❄️朝早唔太熱🔥就用一個Weekend嘅時間，揸住架車，帶埋身邊人去車中泊／Glamping，欣賞下本地嘅湖光山色🍂🍁

香港四成土地係郊野公園範圍，天然資源豐富，城郊只有一步之遙，因此深得唔少遊客鍾情🧰。近幾年，因疫情被困嘅香港人開始發掘本地山水之美，行山、露營、下水，成為唔少人Weekend必做嘅事！


要注意嘅係，係郊區唔可以隨意生火🔥或破壞自然景物🪵，疫情至今政府仍未重新開放各個指定露營地點，未經許可於郊野公園範圍內露營、建立帳幕或臨時遮蔽處都係違法！要小心誤墮法網。

想安心咁玩，可以選擇去一啲私人嘅營地、農莊。收費營地設施齊全，最難處理嘅水源💧同廁所問題都可以輕鬆解決。如果心郁郁想預約營地，建議都要盡早計劃！根據以往經驗，早一兩個月開始要叫定朋友然後落booking㗎啦，急Call一波露營先！

建議啱啱接觸露營嘅新朋友，可以從車中泊／Glamping作為入門選擇。如果有🚗代步，唔洗雞手鴨腳咁抽住露營Gear，相信令到旅途更加舒服～如果你揸電車就更爽啦！熱個陣可以捐入車箱過下冷河，一啲小型家電用具都可以借用車嘅電池發電🔋當然都唔好駁個大雪櫃Chur盡電池壽命啦。

另外，越野車款總係深得人歡心，有啲鍾意汽車露營嘅車主甚至會加裝臨時「車頂營」或者「外伸帳篷」。雖然可以令到架車Raw味倍增，更添山系風格👨🏻‍🌾，但要小心外加嘅裝置會影響行車安全，更嚴重嘅係由於相關裝置普遍都未經申報同批准，一旦發生意外，保險公司有機會拒絕賠償🙅🏻‍♂️唔好因為型而樂極生悲呀！

個個都講「露營必須酒」呢句經典兒歌歌詞🍻想試車中泊／揸住愛驅去Glamping嘅各位車主，千祈唔好信呢句！

揸車的話，露營不需酒！飲完酒就唔好揸車啦，好好地咁享受下寧靜嘅郊外啦！